ROXAS CITY – Nag-negatibo sa SARS-CoV-2 nga amo ang causative agent sang coronavirus disease (COVID-19) ang duha ka mga suspect cases sa probinsiya sang Capiz.
Ini ang base sa pinakaulihi nga report nga ginpaguwa sang Capiz Provincial Health Office (PHO).
Sa pihak nga bahin, sa 107 ka mga suspected cases sa Capiz, 81 na diri ang naka-recover, 12 ang yara pa sa ospital, 1 ang naka-community quarantine kag 1 ang padayon man ang isolation.
Sa 12 ka mga nagkalamatay nga suspected cases, 1 lamang diri ang nag-positibo kag 11 ang negatibo sa nasambit nga balatian.
Sa 157 naman ka mga High Risk Contacts (HRC’s), 156 na sa mga ini ang nag-negatibo sa COVID-19 kag 1 ang padayon pa nga naka-community isolation.
Samtang, 10 sa 12 ka mga repatriated Overseas Filipino Workers (OFW’s) ang napaidalom na sa real-time polymerase chain reaction (RT-PCR) test kag ang duha ang natalana pa nga kuhaan sang ila nga sample specimen.
Mahibaluan nga wala na sa karon sang active COVID-19 case ang probinsiya sang Capiz matapos nga 2 sa 5 ka mga una nga napagkit nga kaso sang balatian ang napatay na kag ang 3 naman ang dalayon na nga nakarekober ukon nag-ayo.
