MANILA-Nagapreparar ang House prosecution panel sang tubtob 20 tubtob 25 ka saksi para mapamatud-an ang alegasyon sang unexplained wealth batok kay Vice President Sara Duterte.
Suno kay Manila 3rd District Representative Joel Chua, mahimo nga magnubo sa mga 10 ka saksi ang prosecution kon magsugot ang kampo ni Duterte nga magstipulate sa authenticity sang linibo ka financial kag bank records.
Apang kon indi magsugot ang depensa, posible nga mag-abot sa 20 tubtob 25 ang mga ipatawag nga saksi, lakip ang mga opisyal sang Anti-Money Laundering Council, Bureau of Internal Revenue, Securities and Exchange Commission kag mga bangko.
Ginpahayag ni Chua nga ginatan-aw man si Duterte bilang posible nga katapusan nga saksi sang prosecution, bangud yara siya sa sentro sang apat ka impeachment articles. Apang mahimo nga gamiton sang iya mga abogado ang constitutional right batok sa self-incrimination.
Samtang, gin-cross-check na sang prosecution ang 15 ka bank accounts nga una nga ginpresentar ni anay senador Antonio Trillanes IV, kag ginkumpirma ni Chua nga nag-angay ini sa mga account nga yara sa records sang AMLC.
Ginklaro man ni Chua nga ang ₱6.7 bilyon nga nagaluntad sa AMLC records indi nagakahulugan nga amo ini ang kabug-usan nga assets ni Duterte, kundi total nga balor sang mga transaksyon, lakip ang deposits kag withdrawals.
