20 ang kwalipikado nga mga atleta sang Capiz nga magaabanse sa Palarong Pambansa 2026 sa Agusan del Sur nga natalana sa Mayo 24.
Sa interview sang Bombo Radyo kay Mr. Ronnie Reteracion, Sports Coordinator sang Department of Education (DepEd Capiz), iya ginpahayag nga nagapadayon ang training sang mga atleta tubtob sa Mayo 13 kag sa Mayo 15 amo ang pagbyahe na pakadto sa Agusan del Sur.
Lakip sa mga sports nga ginapasakopan sang 20 ka mga atleta sang probinsya amo ang athletics, boxing, wrestling, table tennis kag sa bahin sang ParaGames.
Suno kay Reteracion, nagalaum ini nga makadala pa sang dugang nga bulawan nga medalya ang mga Capiznon athletes para sa Western Visayas.
Samtang, ginahandaan man sang DepEd Capiz kag sang Provincial Government ang pag-host sang Capiz para sa Western Visayas Regional Athletic Association (WVRAA) Meet sa tuig 2027.
