Ginaduso ni Senador Erwin Tulfo ang 20% nga discount sa mobile loads kag internet services para sa mga Filipino students agud mabuligan ang mga pamilya nga nagahimakas sa pag-finance sang online learning.
Sa idalom sang Senate Bill No. 2275 ukon Student Load Discount Act nga gin-file ni Tulfo, ang discount nagasakop sang mobile prepaid load, mobile postpaid plans kag mobile internet packages.
Katuyuan sang proposal nga mabuhinan ang dugang nga gasto sang mga estudyante kag sang ila mga ginikanan, ilabi na subong nga masami nga napilitan ang mga buluthuan nga magsaylo sa online classes bangud sa malain nga panahon.
Suno kay Tulfo, indi na bastante ang daan nga konsepto sang class suspension nga nagakahulugan nga wala sang klase, bangud madamo nga mga eskwelahan ang nagagamit subong sang online learning agud malikawan ang delay sa pagtuon.
Sakop sang proposal ang mga Pilipino nga naka-enroll sa elementarya, sekondarya, technical-vocational kag higher education, magluwas sa post-graduate studies.
Ang 20% nga discount mahimo magamit sa bug-os nga tuig, lakip ang weekends kag holidays, samtang ang mga estudyante dapat magpakita sang school ID ukon pamatuod sang enrolment kag birth certificate agud makuha ini.
