Kapin sa 20 ka mga pasahero ang luwas nga na-rescue matapos nga nag-angkon sang engine failure ang isa ka ferry boat sa kadagatan malapit sa Basilan sang Biyernes suno sa mga otoridad.
Suno sa report, ang wooden-hulled nga M/L Julifer ang naghalin sa Zamboanga City sang Biernes sang kaagahon padulong sa isla sang Laminusa sa banwa sang Siasi, Sulu.
Mga alas 3 kaina sang kaagahon, ginpahayag nga nag-untat ang makina sang sakayan pandagat samtang yara ini sa guwa sang Lampinigan Island sa syudad sang Isabela.
Bangud sini, napilitan ang mga pasahero kag crew nga magpangayo gilayon sang bulig.
Gilayon naman nga nagresponde ang mga personnel sang Basilan Provincial Disaster Risk Reduction and Management Office (PDRRMO) kag Isabela City Disaster Risk Reduction and Management Office (CDRRMO), kaupod ang Philippine Coast Guard agud magpatigayon sang rescue operation.
Suno sa mga otoridad, luwas nga gin-evacuate ang tanan nga mga pasahero kag crew kag temporaryo nga gindala sa Lampinigan, antes gindala sa Isabela port.
Naghatag sang bulig ang Isabela City Social Welfare and Development Office (CSWDO) kag City Health Office (CHO) paagi sa pag-profile kag paghatag sang medical services sa mga na-rescue.
Nahibaluan nga pila lang ka oras antes ang insidente, nagpagwa sang temporaryo nga suspension sang sea trips ang Coast Guard bangud sa pag-abot sang Tropical Depression Basyang.
