Nakabenepisyo ang 200 ka indigent senior citizens sa Roxas City sa ginapatuman nga Localized Social Pension Program sang Roxas City Government.
Suno sa city government, ang mga benepisyaryo kabahin sa mga senior citizens nga wala pa nakasulod sa programa sang Social Pension sang Department of Social Welfare and Development (DSWD) bangud sang limitado nga alokasyon sang pondo sa national government.
Pinaagi sa lokal nga programa, ginahatagan sang bulig pinansyal ang mga tigulang nga nagakinahanglan sang suporta para sa ila adlaw-adlaw nga panginahanglanon.
Gin-athag man sang lokal nga panguluhan nga bisan 200 pa lamang ka senior citizens ang nabuligan sa subong, padayon ang ila pag-paninguha nga mapalapad ang programa agud mas madamo pa nga mga lolo kag lola sa syudad ang makabenepisyo sang pension assistance.
Ginpahayag sang city government nga nagapadayon ang ila mga tikang sa pagpangita sang pondo kag mga paagi agud mas mapalapad pa ang ayuda para sa mga senior citizens nga wala pa nakabaton sang benepisyo halin sa national nga programa.
