ROXAS CITY – Nagpadulong sa estasyon sang pulisya ang 200 ka mga indibidwal nga na biktima sang illegal recruiter.
Sa exclusive interview sang Bombo Radyo Roxas kay Police Master Sergeant Ramil Arcangeles, public information officer sang Roxas City PNP, nga ginganyat ni Ramilyn Andrade sang Barangay Bolo, Roxas City ang mga biktima sang maayo nga trabaho sa South Korea.
Apang nagaguwa sa imbestigasyon sang mga pulis nga si Andrade kag si Korean national Kim Tayyong ang magkarelasyon kag may kahilabtanan sa LG Santon Company nga nagapangita sang mga factory worker para magtrabaho sa South Korea.
Ginganyat ni Andrade ang iya nga mga biktima sang dako nga sweldo sa South Korea nga nagalab-ot sa P130,000 kada bulan.
Suno kay Arcangeles nga nagpangayo sang bulig sa ila ang 200 ka mga complainant nga natuntuhan ni Andrade kag Tayyong.
Ginaalegar sang mga biktima nga nagbayad sila sang dako nga kantidad sang kwarta kay Andrade bilang bayad sa placement fee, pocket money, terminal fee kag insurance apang tubtob sa karon wala pa sila nakalakat.
Mahibaluan nga tatlo na ka beses sila nga ginpromisahan ni Andrade nga madayon ang ila trabaho sa South Korea.
Bangud diri, wala na nagduha-duha ang mga complainant nga ipalab-ot sa pulisya ang natabo.
