ROXAS CITY – Madinalag-on ang ginhiwat nga National kag Local elections sa probinsya sang Capiz.
Ini ang ginpahayag ni Atty. Salud Milagros Villanueva sang Comelec Capiz sang mainterview sang Bombo Radyo.
Apisar nga may mga Vote Counting Machines (VCMs) kag SD cards nga nagkalapalya, natigayon man ini nga gilayon makay-o bangud may yara na sang technical hubs sa probinsya, indi kapareho sang nagligad nga sa Region pa ini nahamtang.
Nangin mataas man sa karon nga tuig ang numero sang mga nagpartisipar sa pagboto apisar nga may pandemya, ikumparar sa nagligad nga 2019 nga eleksyon.
Sa pihak nga bahin, ginkumpirmar ni Villanueva nga may mga nagpadulong sa ila nga talatapan agud magreport sang nagkahinabo nga vote-buying sa ila banwa, apang wala man ang mga ini nagduso sang pormal nga reklamo agud mahatagan sang nagakaigo nga pagtamod ang ila alegasyon.
Suno diri, kinahanglan nga ipaagi sa legal nga proseso ang kaangay nga reklamo, pinaagi sa pag-file sang formal complaint.
