PROSPERIDAD, Agusan del Sur – Pormal nga madinalag-on nga natapos subong nga Domingo, Mayo 31, 2026 ang Palarong Pambansa sa Datu Lipus Makapandong Cultural Center sa Probinsya sang Agusan del Sur, matapos ang isa ka semana nga kompetisyon kag pagpakita sang talento sang tagsa ka estudyante nga atleta nagikan sa nagkalain-lain nga rehiyon sang pungsod.
Nagsugod ang closing ceremony alas-2 sang hapon sa kun sa diin nagtipon ang mga atleta, kasunod sang unity parade kag espesyal nga presentasyon.
Kabahin sang programa ang pag-anunsyo sang mga nagdaog sa elementarya kag sekundarya nga kategorya, overall champion, nagdaog sa Para Games, Top Five Performing Schools Division Offices, kag Most Bemedalled Athlete.
Lakip man sa tradisyunal nga ritual pareho sang pagpanaug sang bandera sang Pilipinas, Department of Education ukon ” DepEd”, kag Palarong Pambansa, lakip na ang pagpatay sang Unity Cauldron bilang simbolo sang pagtakop sang torneo.
Ginkilala man ang mga natungdan nga atleta, lakip si gold medalist Breanna Aaliyah Erno bangud sang iya talalupangdon nga performance sa swimming competition.
Samtang, gin-anunsyo nga ang Quezon City ang mangin host sang masunod nga edisyon sang Palarong Pambansa sa pagpanguna ni Mayor Ma. Josefina “Joy” Belmonte.
Nagtapos ang programa sa paghatag sang plaques of appreciation, closing prayer kag grand unity dance finale nga may tema nga “We Rise As One: The Ultimate Palaro Dream,” nga ginpakita sang mga lokal nga artista, opisyal kag delegado.
Sa karon nahibaluan ang Agusan del Sur amo ang nag-host sang 2026 Palarong Pambansa halin Mayo 24 tubtob Mayo 31 nga nagtigum sang linibo ka mga atleta, coach kag delegado gikan sa bug-os nga pungsod.
