Ginpatigayon sa banwa sang Panay ang 2026 Provincial Cooperative Month Trade Fair bilang kabahin sang duha ka adlaw nga selebrasyon sang ika-33 nga Capiz Provincial Cooperative Month.
Sa interview sang Bombo Radyo kay Panay Mayor Jonathan B. Besa, iya ginpahayag nga nagpasalamat ang banwa sa nagkalain-lain nga kooperatiba, ahensya sang gobyerno kag lokal nga panguluhan nga nagpakigbahin sa aktibidad nga nagatinguha nga mapabaskog ang pagbinuligay kag pag-uswag sang komunidad.
Suno kay Besa, nagpakigbahin sa trade fair ang nagkalain-lain nga kooperatiba kag lokal nga producers sa Capiz agud ipakita kag ipakilala sa publiko ang ila mga produkto, lakip ang mga lokal nga delicacy, handicrafts, produkto sang agrikultura kag pangisdaan, kag iban pa nga produkto nga ginhimo sang mga Capiznon.
Magapadayon ang selebrasyon sa Oktubre 23 paagi sa culminating activity, Cooperative Quiz Bee, Cooperative Sales Contest kag raffle draws agud mapabakod ang pagbinuligay kag pagpakigbahin sang mga kooperatiba sa probinsya.
Ginapaabot nga paagi sa sini nga aktibidad, mas madamo nga tawo ang makakilala kag makasuporta sa lokal nga mga produkto, nga makahatag sang dugang nga oportunidad sa pangabuhian kag makabulig sa padayon nga pag-uswag sang ekonomiya sang Capiz.
