ROXAS CITY – Natalana nga mapasakaan sang kaso subong nga adlaw ang 21-anyos nga lalaki nga nadakpan sa ginkasa nga drug buybust operation sang mga otoridad sa Barangay Ilaya-Ivisan, Ivisan, Capiz sang damlag lang.
Matandaan nga ginkilala ang suspek kay Joshua Ureta, residente sang Barangay Santa Cruz, sa nasambit nga banwa.
Sa interview sang Bombo Radyo kay PLT. Jason Gimeno Hepe sang Ivisan Municipal Police Station ginpahayag sini nga matapos ginpaidalum sa drug test si Ureta, naguha sa resulta nga positibo ini nga nagagamit sang droga.
Suno kay Gimeno, pinaagi sa ila ginkasa nga drug buy bust operation nakuha sa paghinakop ni Ureta ang apat tanan ka sachets sang ginapatihan shabu nga ginabulubanta nagabalor sang masobra P13,000 kag P500 nga marked money.
Kaso nga paglapas sa Republic Act 9165 ukon Comprehensive Dangerous Drugs Act of 2002 ang paga-atubangon sang amu nga suspek.
