ROXAS CITY – Kritikal ang isa ka lalaki matapos nga maaksidente sa ginamaneho nga motorsiklo sa Barangay San Vicente, Jamindan, Capiz takna alas 2:55 kaina sang kaagahon.
Ginkilala ang biktima kay Reymark Agustino Degoma, 21 anyos residente sang Barangay Agambulong banwa Jamindan.
Sandig sa imbestigasyon sang Jamindan Municipal Police Station, samtang ginasubay sang biktima ang dalanon nagikan sa isa ka binaylehan aksidente ini nga nadulaan sang kontrol sa pagmaneho rason nga natumba ini kag nag-angkon sang patal nga kapilasan sa ulo kag dughan.
Ginpadangat pa sang responders ang biktima sa Mambusao District Hospital apang ini ang ginbawian gid sang kabuhi.
Mahibaluan nga yara sa impluwensya sang makahulubog nga ilimnon ang biktima sang natabo ang aksidente.
Sa karun, yara na ang bangkay sang biktima sa isa ka punerarya sa nasambit nga banwa.
