SIGMA, CAPIZ – Dead on arrival ang isa ka 21 anyos nga lalaki matapos nga ginaalegar nabungguan sang isa ka pampasahero nga bus sa Barangay Mianay, Sigma, Capiz.
Ginkilala ang biktima nga si Regie Espirito, sang Barangay Malapad Cogon, Sigma, Capiz.
Base sa inisyal nga imbestigasyon sang mga kapulisan nga nag-overtake ang biktima sakay sa iya sini ginamaneho nga motorsiklo sa isa ka tricycle nga ginamaneho ni Aljon Lipardo, 31 anyos kag residente sang Poblacion, Mambusao, Capiz.
Apang sang pag-overtake na sang biktima, aksidente naman ini nagbunggo sa nalikod nga porsyon sang tricycle rason nga natumba ang ginamaneho sini nga motorsiklo.
Bangud diri, natabuan nga may nagapadulong nga isa ka bus nga naggikan sa probinsya sang Iloilo padulong sa syudad sang Roxas kag aksidente naman nga nabungguan sini ang biktima.
Ginkilala naman ang driver sang bus kay Silverio Cortes, 43 anyos sang Poblacion Ilaya, Dumarao, Capiz .
Gilayon naman nga gindala sa ospital ang biktima apang gindeklarar man ini nga Dead on Arrival.
