ROXAS CITY-Nakabaton sang bulig halin sa Gobyerno Probinsyal sang Capiz ang 21 ka manunudlo sa Barangay Olotayan, Roxas City, nga nagapangatubang sang kabudlayan sa pagtabok sa mabalod nga kalalawran agud makaabot sa ila ginatudluan nga mga kabataan. Personal nga nakigkita sa ila si Governor Fredenil H. Castro sa talatapan sang gobernador sa Kapitolyo sang Oktubre 9, 2026.
Sa ila pagpakigkita, ginpahayag ni Castro ang iya pagkabalaka sa sitwasyon sang mga manunudlo kag ginpasalig nga magapadayon ang bulig sang probinsyal nga gobyerno para sa ila, nga igahatag kada tatlo ka bulan.
Suno sa gobernador, importante ang papel sang mga manunudlo sa paghatag sang edukasyon sa mga kabataan, gani kinahanglan nga mahatagan man sila sang suporta sa pag-atubang sang mga kabudlayan nga ila ginapangatubang sa pagtuman sang ila katungdanan.
Ang bulig ginatinguhaan nga makadugang suporta sa 21 ka manunudlo nga padayon nga nagaserbisyo sa mga kabataan sa isla sang Olotayan, bisan pa sa mga kabudlayan sa pagbiyahe kag pagtabok sa dagat.
Paagi sa sini nga tikang, ginapakita sang Gobyerno Probinsyal sang Capiz ang paghatag sang suporta sa mga manunudlo nga nagapadayon sa ila misyon nga masiguro ang kahigayunan sang mga kabataan nga makabaton sang edukasyon, bisan pa sa mga komunidad nga malayo kag mabudlay maabtan.
