ROXAS CITY – Nakahunong na sa karsel sang Roxas City Police Station ang 21 ka mga persona matapos nga maaktuhan nga nagahampang sang billiards/bilyar sa Barangay Bolo, Roxas City.
Suno kay Police Captain Alcer Monsera, Team Leader sang Capiz Provincial Anti-Criminality Team (Capiz PROACT) nakabaton sila sang impormasyon nga may yara sang grupo sang mga kalalakinhan nga nagabilyar rason nga madasig sila nga nagpadulong sa nasambit nga lugar.
Lakip sa mga nagkaladakpan amo ang 11 ka mga Capizeño nga sanday Arvie Alvarez sang Barangay Bolo, Mark Kenney Acla sang Barangay Culasi kag Juan Dillo sang Barangay Li-ong sining syudad.
Nadakpan man sanday Gabriel Labrador, Julius Quistadio kag Kent Julius Qiluistadio nga lunsay mga residente sang banwa sang Sigma, Joemarie Fegarido, Juan Paul Frial kag Rusty Dela Cruz sang Dumalag, Marlo Bunyag sang Cuartero kag Brian Coronado sang Panitan, Capiz.
Magluwas diri, nadakpan man ang lima ka mga indibidwal gikan sa Iloilo nga sanday Sebastian Pinol nga taga-banwa sang Dingle, Juan Vernie Laborro sang Lapaz, Revic Longno kag Romeo Pediuria sang Jaro kag Antonio Porras sang Janiuay, Iloilo.
Samtang, lima naman ang nadakpan nga lunsay mga residente sang Antique amo sanday Jay Loui Flores, Jessie Dagumanpan, Reylan Sanggalan, Felix Paulino kag Mark Ian Ureta.
Mahibaluan nga napaslawan nga magprisentar sang permit ukon anuman nga mga dokumento ang nasambit nga mga indibidwal matapos nga ginpangitaan sila sang mga kapulisan.
Narekober naman sang mga kapulisan ang 2 billiard poles, 10 billiard balls, 2 cue cases, cue bridge, score board, cellphone kag bet money nga ginabulubanta kapin sa P33,850.
Nagpahanumdum naman si Monsera nga kun mahimo untaton na ang pagpatigayon sang iligal nga sugal bangud wala gid ini sang maayo nga padulungan.
