ROXAS CITY-Natalana nga ipaidalom sa Real-Time Polymerase Chain Reaction ukon RT-PCR test ang mga naka-close contact sa napatay nga nagpositibo sa COVID-19 sa banwa sang Pontevedra.
Sa interview sang Bombo Radyo kay Pontevedra Mayor Esteban Dodoy Evan Contreras ginpahayag sini nga 21 ka mga indibidwal ang naka-contact sa 67-anyos nga lalaki nga nagpositibo sa nasambit nga sakit apang gilayon man nga ginbawian sang kabuhi.
Suno kay Contreras nga 14 diri sa mga na-contact trace ang lunsay himata sang nagpositibo samtang 7 naman diri ang mga health workers.
Gindugang pa sini nga posible ang duha sini ka mga kabataan ang carrier sang virus nga masami nga nagaguwa sa ila nga balay agud magpadulong sa trabaho bangod wala man ini sang history of travel gikan sa mga lugar nga infected sa amo nga balatian.
Mahibaluan nga ini na ang labing una nga kaso sa Pontevedra suno kay Contreras nga wala sang history of travel nga nagpositibo sa amo nga sakit.
Ginkompirmar man sang alkalde nga may yara sang ginasuprer nga balatian ang nasambit nga pasyente.
Matandaan nga kapin isa ka semana na nga nagasuprer sang ubo kag nakabatyag sang kabudlay sa pagginhawa ang pasyente, antes ini ginbawian sang kabuhi.
Ginpaidalom ini sa RT-PCR test kun sa diin nagpositibo ang iya resulta apang ginbawian man sang kabuhi.
Sa karon naglab-ut na sa 14 ang kabug-osan nga kaso nga napagkit sa banwa sang Pontevedra.
