Naglab-ot na sa 21 ka mga Palestinian, lakip na ang anum ka kabataan, ang napatay sa Israeli tank shelling kag airstrikes sa Gaza, suno sa mga health officials.
Lakip sa mga napatay ang isa ka medic nga nagresponde sa una nga pag-atake kay Khan Younis. Napatay man ang lima ka bulan nga lapsag sa Gaza City.
Pila man ka mga tent ang naguba sa Mawasi, coastal area malapit sa Khan Younis, sa diin linibo ka mga pumuluyo ang nadulaan sang puluy-an kag nag-evacuate. Masobra duha ka milyon ka pumuluyo sang Gaza ang napilitan nga magpalagyo.
Suno sa Israeli military, ginhimo ang pag-atake bilang sabat sa gina-alegar pag-atake sang mga militante nga Palestinian, samtang ginpanindugan naman sang Hamas nga ginalapas sang Israel ang ceasefire agreement kag nagpanawagan sang aksyon sang International Community agud mauntat ang kalakasan.
Bangud sa insidente, temporaryo nga na-delay ang pagpaagi sang mga Palestinian patients padulong sa Egypt sa Rafah crossing.
Sa kabug-usan 29 ka tawo ang napatay halin sang ginbuksan liwat ang boarder, kag halin sang ginpatuman ang ceasefire, indi magnubo sa 530 ka mga Palestinian—kalabanan mga sibilyan—ang napatay, samtang apat naman ka mga soldado sang Israel ang ginbawian sang kabuhi.
