ROXAS CITY – Ginbawian sang kabuhi ang 22-anyos nga lalaki matapos maaksidente sa ginamaneho nga motorsiklo sa karsadahon nga sakup sang Barangay Poblacion, Sapian, Capiz, alas-10:25 kagab-i sang Sabado, Hulyo 9.
Ginkilala ang driver sang Honda CBR, nagaduag pula nga motorsiklo kay Carl Jossef Agana Orillos, 2nd year college student, kag residente sang Barangay Lonoy, sa amu man nga banwa.
Sandig sa pagpakig-angut sang Bombo Radyo sa traffic section sang Sapian MPS, nga samtang ginasubay sang driver ang amu nga dalan nagikan sa Poblacion padulong sa direksyon pa Maninang, sa nasambit nga banwa, ginapahayag nga nadulaan ini sang kontrol sa manubela, nga gintunaan sang iya pagkatumba.
Nag-angkon ang biktima sang kapilasan sa magkatuhay nga parte sang iya lawas, nga gilayon ginpadangat sang iya pamilya sa Mambusao District Hospital, apang wala ini makasalbar sa kamatayon.
Gintugyan sang mga kapulisan ang nasambit nga motorisklo sa utod sang biktima.
