ROXAS CITY – Nagpositibo sa Coronavirus Disease 2019 ukon COVID-19 ang isa ka 23-anyos nga babaye kag isa ka Locally Stranded Individual ukon LSI gikan sa Cavite kag residente sang Barangay Jaena Norte, Jamindan, Capiz.
Ini ang ginpahayag ni Mayor Mac Arthur Valdemar sang Jamindan, Capiz sang ma-interview sang Bombo Radyo Roxas
Ang nasambit nga pasyente ang nakabatyag sang sip-on pag-abot sa probinsya rason nga ginpakamaayo ini nga dal-on sa Roxas Memorial Provincial Hospital ukon RMPH sadtong Hunyo 29.
Ginkumpirmar ni Valdemar nga nagpositibo sa COVID-19 ang wala na ginhingadlan nga LSI matapos nga ginpaidalom ini sa Real Time-Polymerase Chain Reaction Test ukon RT-PCR test sadtong Hulyo 1 apang subong lamang nga adlaw Hulyo 17, 2020 nag-abot ang iya nga resulta.
Matandaan nga nag-abot ini sadtong Hunyo 26, 2020 sa probinsya kag gilayon nga ginpaidalum sa sa 14 day quarantine.
Dugang pa ni Valdemar nga ang panibag-o nga napagkit nga positibo sa nasambit nga balatian ang close friend man sang COVID-19 patient nga una na narekord nga positibo sa COVID-19 kag residente man sang Jamindan.
Ginpahayag pa sang nasambit nga alkalde nga magkaupod sila nagpadulong sa probinsya sang Capiz kun sa diin antes sila makapauli ginsugat niya pa ini sa Makati kag magkaupod sila nga nagpadulong sa Batangas.
Bangud diri, padayon nga ginamonitor ang mga indibidwal ukon LSI’s nga nakaupod man sini sa pagpauli sa probinsya.
Apang gin-athag ni Valdemar nga wala ini nakapauli sa ila barangay bangud nag diretsu man ini sa quarantine facility.
Sa karon, yara na sa estable nga kondisyon ang amo nga pasyente kag nagapabilin sa Roxas Memorial Provincial Hospital ukon RMPH para sa nagakaigo nga pagbulong.
Mahibaluan nga ini na ang ikalima nga COVID-19 patient nga narekord sa banwa sang Jamindan, Capiz.
Nagpasalig naman si Valdemar sa mga residente nga padayon ang ila monitoring kag pagpatigayon sang contact tracing agud malikawan nga madugangan pa ang kaso sang COVID-19 sa ila banwa.
Magluwas diri, nagpanugyan man ang nasambit nga alkalde nga magsunod sa mga preventive measure ukon protocols kag mag kooperar sa mga panugyan sang LGU’s.
Nahibaluan nga may yara pa sang anom ka mga LSI’s nga lunsay mga residente sang Jamindan ang natalana nga mag-abot sa probinsya kag may yara na sang letter of acceptance nga makapauli gikan sa ila lokal nga gobyerno.
Samtang, ini na ang ika-20 nga kumpirmado nga kaso sang COVID-19 sa probinsya sang Capiz.
