ROXAS CITY – Patay ang isa ka surveyor matapos nga aksidente nga masalapay ang live wire sa barangay Matagnop, banwa sang Dao.
Ginkilala ang biktima kay Adriane Albarez, 23-anyos kag residente sang barangay Lawaan, syudad sang Roxas.
Suno kay Rene Palomo, barangay kapitan sang amo nga barangay nga may yara sang live wire sa lugar kun sa diin nagatrabaho ang biktima kag nagapati man ini nga naigo sang stainless nga ginagamit sa pagsukat sang biktima ang live wire rason nga gintunaan sang iya kamatayon.
Madasig nga ginpadangat ang biktima sa Senator Gerardo M. Roxas Memorial Hospital sa banwa sang Dao apang gindeklarar sang doktor nga dead on arrival na.
Ginpalab-ot naman sang barangay officials sang nasambitan nga barangay ang natabo nga insidente sa Capiz Electric Cooperative (CAPELCO).
Dugang pa sang Kapitan nga makapila na ka beses sini nila nga ginpalab-ot sa nasambit nga ahensiya apang wala ini ginhatagan sang aksyon.
