ROXAS CITY – Natumod na ang 24-anyos nga lalaki nga ginaalegar ginpulihan kastigo kag nalumos sa Libas Fishing Port, Barangay Libas, Roxas City.
Ginkilala ang biktima kay Juveth Candelario, Alyas “Bambi”, 24 anyos kag residente sang nasambit nga lugar apang tumandok sang Calachuchi, Milagros, Masbate.
Ini ang emosyunal nga ginkompirmar mismo sang live-in partner sang biktima nga si Marivic Laurelia 26-anyos kag tumandok sang Masbate apang temporaryo nga nagatinir sa Rizal Street, Barangay 5 sining siyudad kag nagatrabaho bilang kabulig sang mainterview sang Bombo Radyo.
Suno kay Laurelia nga diri na lamang sa probinsya sang Capiz ilubong ang iya nga bana.
Sandig sa imbestigasyon sang Roxas City Police Station, ginkaakig sang mga suspek nga sanday Alyas “Bongbong Bangag”, Marko Borres, 26 anyos kag Grey Cortel, 30 anyos nga lunsay mga residente sang nasambit nga barangay ang mainit nga diskusyon sa tunga nila sang biktima rason nga ginpulihan nila ini kastigo nga nagresulta sa pagkahulog sang biktima sa tubig dagat.
Mahibaluan nga gintinguhaan pa nga makuha ang biktima sa idalum sang tubig kag gilayon nga gindala sa Roxas Memorial Provincial Hospital apang gindeklarar nga Dead On Arrival sang attending physician.
Madasig man nga nadakpan ang duha ka mga suspek kag yara na karon sa Custodial Facility sang nasambit nga istasyon apang nagapabilin naman nga at-large si Alyas “Bongbong Bangag”.
Nagapadayon naman sa karon ang hot pursuit operation sang mga kapulisan sa lokasyon sang isa pa suspek kag imbestigasyon sa nasambit nga insidente.
