JAMINDAN, CAPIZ – Hilway na sa karsel ang 24 anyos nga lalaki nga nagtuyo nga magpalagyo samtang yara sa Office of the Provincial Prosecutors sa Hall of Justice.
Ini bangud wala na qualify ang ginpasaka nga panumbungon nga arson batuk sa suspek matapos nga boluntaryo man ini nagsungka kag gin-ako ang nasambit na insidente.
Ginpahayag ni Senior Fire Officer 3 Anthony Espeda, hepe sang Jamindan Fire Station nga ginsunog sang suspek nga si Joner Catalan ang isa ka balay sa Barangay Agambulong, Jamindan, Capiz.
Mahibaluan nga samtang ginaproseso ang mga papeles nga iga-file kuntani sa suspek hinali na lamang ini nga nagdalagan kag nagtuyo nga magpalagyo gikan sa Hall of Justice.
Apang, nadakpan man ini gilayon sa McKinley St., sining siyudad matapos nga ginlagas ini sang sapatero nga si James Delector.
Samtang, suno sa nasambit nga hepe nga posible ginkulbaan ang amo nga suspek sa mangin resulta nga igapasaka nga panumbungon batuk sa iya rason nga nagpalagyo ini sa mga kapulisan.
Dugang pa ni Espeda nga “case closed” bangud wala na nagpadayon pa ang tag-iya sang balay nga ipadayon ang kaso batuk sa suspek.
