ROXAS CITY-Ginpanindugan sang 25-anyos nga ginang nga mangita ini sang trabaho sa Estancia, Iloilo rason nga nag-tuyo ini nga maglusot nga wala nag-agi sa checkpoint sa Barangay San Nicolas, Pilar, Capiz.
Ginpahayag ni Rosejean Billones sang Barangay Monteflor, sang nasambit nga banwa nga mangita kuntani ini sang trabaho bangud wala na sang trabaho ang iya bana sa Metro Manila apang pag-abot sa border checkpoint sa nasambit nga barangay, ginpabalik ini sang mga kapulisan.
Apang bangud sa kagustuhan sini nga makalakat, sa baylo nga magpauli ginpakamaayo sini nga magpanglaktud kun sa diin liwat siya nga nasiplatan sang mga kapulisan sa Barangay Camambugan, Balasan, Iloilo.
Ginpakamaayo sang kapulisan nga isakay sa patrol si Billones kaupod ang pito ka tuig nga bata sini pabalik sa Barangay Monteflor, Pilar.
Ginpanindugan man ni Billones nga gindala sini ang pito ka tuig nga bata bangud wala ini sang bilinan sa iya nga anak.
