ROXAS CITY – Gindala na sa Bureau of Jail Management and Penology (BJMP) Roxas City Jail ang 25 anyos nga lalaki matapos nga nadakpan nga nagapangawat sang pato/itik sa Barangay Lanot, Roxas City.
Ginkilala ang suspek nga si Rayan Teranti alyas Amo, 25 anyos sang Barangay Lawaan sining siyudad.
Matandaan nga nagpabalhag sang reklamo si Cynia Dela Cruz, 56 anyos sang Barangay Lanot matapos nga nakita sang gumangkon sini ang suspek nga nagabitbit sang sako nga nagaunod sang mga pato/itik, cellphone kag iban pa nga mga kagamitan.
Sa pihak nga bahin, nagpabalhag man sang reklamo si Emily Beliano, 53 anyos sang Barangay Lanot nga sang nakaligad nga Enero 11 sining tuig sa diin ginaalegar nga nagpangawat man ang suspek sang duha ka pato/itik kag kwarta.
Magluwas diri, nagparekord man sa Roxas City PNP ang isa ka 63-anyos nga ginang matapos nga ginaalegar gintaban sang nasambit nga kawatan ang iya nga bag.
Ginkilala ang tagreklamo nga si Oliva Celoso sang nasambit nga lugar.
Sandig sa ginpabalhag ni Celoso nga ulihi na sini natukiban nga ginkawatan ini sang suspek sa diin ginaalegar gintaban ang iya bag nga may unod nga kwarta nga P3,300 kag importante nga mga dokumento.
Sa karon, nakahunong na sa Roxas City Jail ang nasambit nga persona.
