MAMBUSAO CAPIZ – Ginbawian na sang iya hulam nga kabuhi ang driver sang motorsiklo, matapos ginapahayag naglusot sa kariton sang truck sa Barangay Bula, Mambusao, Capiz.
Sa interview sang Bombo Radyo kay Police Captain Shaney Allanic, hepe sang Mambusao Municipal Police Station ginpahayag sini nga kaina pasado alas 4:00 sang aga ginkumpirmar sang doktor nga wala na ini sang kabuhi matapos mag-angkon sang patal nga pilas sa iya magkatuhay nga parte sang lawas.
Matandaan nga samtang ginasubay ni Jonathan Dela Cruz driver sang motorsiklo kag residente sang Barangay Bato-bato, Mambusao Capiz ang dalan nagikan sa banwa sang Sapian kag padulong kun tani sa banwa sang Mambusao.
Apang pag-abot sa palikuon nga porsyon sang dalan, aksidente nga natumba ang motorsiklo rason nga nagsuhot ini sa idalum sang guma sang truck nga ginamaneho ni Joemer Villanueva, 39-anyos nga padulong naman kun tani sa Kalibo.
Bangud sa natabo nag-angkon sang patal nga pilas ang driver sang motorsiklo samtang maswerte naman nga nakalumpat ang back rider sini.
Gilayon man nga ginpadangat ang mga ini sa ospital para sa nagakaigo nga pagbulong.
Sa karun nakaguha na sa karsel sang Mambusao MPS ang driver sang truck matapos magtakop ang reglementary period sini.
