25 anyos nga lalaki, patay matapos nalumos sa baha

ROXAS CITY – Patay ang 25 anyos nga lalaki matapos nalumos sa baha sa Barangay Agkilo, Panit-an, Capiz.

Ginkilala ang biktima kay Junrey Tumambiene, 25 anyos, residente sang Barangay Poblacion Sur, sang nasambit man nga banwa.

Sa inisyal nga imbestigasyon, nagikan sa isa ka balay-ilimnan ang biktima upod ang pila sini ka mga abyan sang sila ang magatabok kuntani sa karsada nga ginabaha sa nasambit nga lugar.

Bangud yara sa impluwensiya sang makahulubog nga ilimnon, nadalin-as ang tiil sang biktima kag nahulog ini sa pilapil.

Bangud sa mabaskog nga ilig sang tubig, wala naman masalbar sang iya mga kaupdanan ang biktima.

Gindala pa sa ospital ang biktima apang gindeklarar nga dead-on-arrival.