ROXAS CITY – Nagapabilin sa isa ka quarantine facility sa banwa sang Pilar ang 25-anyos nga soltero matapos nga nagpositibo sa Coronavirus Disease (COVID-19).
Ini ang ginkumpirmar ni Mayor Arnold Perez sang mainterview sang Bombo Radyo Roxas.
Ang nasambit nga LSI nagikan sa Quezon City, Metro Manila kag nag-abot sa probinsya Hunyo 26 sakay sa 2GO vessel.
Suno kay Perez nga gilayon ginpaidalom sa 14-day quarantine ang nasambit nga LSI kag wala ini nakalagaw sa ila banwa
Nahibaluan nga asymptomatic ukon wala man ini nakabatyag sang anuman nga sintomas sang nasambit nga balatian.
Apang, ginpaidalom ini sa Real Time-Polymerase Chain Reaction ukon RT-PCR Test kag Hulyo 19 lamang nabal-an nga positibo ini sa nasambit nga virus.
Gin-athag naman ni Perez nga yara man sa estable nga kondisyon ang amo nga LSI.
Samtang, ginpakamaayo sang alkalde nga indi na lamang pag-ihambal kun ano nga barangay sang ila banwa nagaestar ang nagpositibo nga LSI.
