Natigayon nga madakop sang kapulisan ang 25 ka mga ginasuspetsahan illegal fishers kag makumpiska ang masobra P1.3 million nga balor sang ginadumilian nga fishing equipment sa serye sang coordinated operations sa Western Visayas.
Ginpatigayon ang regional crackdown sa pagpanguna sang Police Regional Office 6 sa sulod sang 24 oras humalin las 6 sang aga sang Hunyo 12 tubtob 5:59 sang aga sang Hunyo 13.
Nagresulta ini sa siyam ka mga anti-illegal fishing operations kag pagkumpiska sang fishing gear kag iban pa nga mga ginadumilian nga pagkabutang nga naglab-ot sa P1,335,530.
Nakarekord sang pinakamataas nga numero sang mga nadakpan ang Iloilo Province sa diin 18 ang arestado.
Nakumpiska naman sang otoridad ang illegal fishing equipment sa probinsya nga nagabalor sang P741,700.
Sa Guimaras, duha ka mga indibidwal ang nadakpan kag nakumpiska ang fishing gear nga nagabalor P303,500.
Ang Antique nakarekord sang apat ka mga nadakpan kag nakumpiska ang equipment nga nagabalor P194,330, samtang isa naman ka suspek ang nadakpan sa Aklan kag nakumpiska ang fishing gear nga nagabalor sang P96,000.
Suno sa Police Regional Office 6, wala sang anti-illegal fishing operations nga natigayon sa Capiz ukon sa Iloilo City kadungan sang pagpatrolya.
Ginpahayag ni PRO 6 acting director Brig. Gen. Randulf Tuaño nga ang kampanya ang may katuyoan nga maprotektahan ang palangabuhian sang mga lehitimo nga mga manugpangisda nga nagadepende sa kadagatan.
