ROXAS CITY – Nabaton na sang 250 ka mga benepisaryo sang DOLE Tulong Panghanapbuhay sa Ating Disadvantaged/Displaced (TUPAD) Program ang tig-P4,500 nga ayuda nagikan kay anay senador Franklin ‘Kiko’ Pangilinan.
Ini ang ginkumpirmar ni Board Member Thea Faith Reyes, sang mainterview sang Bombo Radyo.
Suno diri, pinaagi sa iya talapatan, nakabaton sang ayuda ang 200 ka mga benepisaryo nga nagikan sa Roxas City samtang 50 naman sa banwa sang Pontevedra.
Ginklaro ni BM Reyes, nga ang nasambit nga pondo ang nag-abot antes pa ang eleksyon apang subong lamang natigayon panagtag bangud may yara pa sang budget ang DOLE para sa nasambit nga programa.
Tinutuyo sang DOLE Tupad Program, nga magbulig sa mga residente nga nadulaan sang pangabuhi-an tuga sang COVID-19 pandemic.
Suno pa sa opisyal nga pinaagi sa LGU’s na-determinar sang ila opisina ang mga mas nagakahinanglan sang bulig kag tuman nga naapektuhan ang pangabuhi-an.
Wala naman naga-untat si BM Reyes nga magpangayo sang bulig sa nasyunal government agud mahatagan sang pondo ang iya opisina kag madamo pa siya sang mabuligan nga nagakinahanglan.
