ROXAS CITY – Nagalab-ot na sa 251 ka mga kongresista ang nag-donate sang ila isa ka bulan nga sweldo para sa ginapangatubang nga krisis sa karon sang pungsod bangud sa coronavirus disease (COVID-19).
Ini ang ginkompirma mismo ni Capiz 1st District Congressman Emmanuel ‘Tawi’ Billones Sr. sang mainterview sang Bombo Radyo Roxas.
Suno kay Billones, ini ang kasunod sang pagganyat sa ila ni House Speaker Alan Peter Cayetano sa pag-donate sang ila nga sweldo.
Kalakip man sa nag-donate sang iya isa ka bulan nga sweldo si Capiz 2nd District Congressman Fredenil ‘Oto’ Castro.
Ginpahayag sini nga ang tagsa ka kongresista ang may yara sang bulanan nga sweldo nga nagalab-ot sa P295, 000 rason nga nakatipon sila sang halos P70 million nga paggagamiton sa pagbakal sang test kits kag mga personal protective equipments (PPE’s) para sa mga frontliners.
Ginkompirma man sang kongresista nga naghatag siya sang P50, 000 nga bulig para sa Roxas Memorial Provincial Hospital nga amo ang COVID-19 referral facility sa probinsiya sang Capiz.
Magluwas diri, nagpanghatag man ang opisyal sang mga food packs para sa mga residente sa pila ka mga kabaranggayan sa siyudad sang Roxas.
Magahatag man ini sang P3 million sa Department of Social Welfare and Development (DSWD) nga igapanghatag sa apektado nga mga residente sa premier-distrito sang probinsiya.
