JAMINDAN, CAPIZ – 254 ka mga bag-o nga soldado ang nagdugang sa pwersa sang 3rd Infantry Division sang Philippine Army.
Ini matapos ang ginpatigayon nga graduation ceremony para sa mga nakatapos sang tatlo ka bulan nga Candidate Soldier Course kag Jungle Warfare Mountain Operation Course (JWMOC).
Sa pagtapos sang nasambit nga bag-o nga mga soldado nga ginpangunahan ni 3ID Commander, Brigadier General Eric Vinoya, nangin dinapit nga bisita kag naghatag sang mensahe si Negros Oriental governor Roel Degamo.
Si Governor Degamo, kaupod si Vinoya kag iban pa nga mga lokal nga opisyales kag mga manunudlo ang nagpanguna man sa pagtugyan sang mga armas sa mga nagtapos sa amo nga kurso.
Nagpanguna sa 127 Candidate Soldier Class 607-2019 si Private Melven Zausa, isa ka graduate sang kurso nga Bachelor of Science in Home Technology gikan sa Barangay Ogsip, Libacao, Aklan nga nagbaton sang pagkilala para sa 3ID Commander nga award.
Si Sausa ang may General Point Average (GPA) nga 89.43 percent sa tanan nga subjects.
Samtang si Private Reydan Durante, isa ka undergraduate sa kurso nga BS Marine Transportation kag gikan sa Purok A1, Katipunan, Sagbayan, Bohol, ang nakakuha man sang kasubong nga award para sa pagpanguna sa Class 606-2019.
Si Durante man ang nakakuha sang Commander’s Physical Proficiency Awards matapos nga magpangibanaw ini sa Physical Fitness Test sa Class 606.
Kalakip man sa nakabaton sang award sanday Private Eraldex Alfornon sang Barangay Tomonoy Moalboac, Cebu, Private Gilbert Zonio sang Barangay Ganson, Jamindan, Capiz, Private Abe Gape sang Barangay San Nicolas, Tapaz, Capiz, Private Francis Norbe sang Barangay Camindangan, Sipalay City, Negros Occidental, kag Private Generoso Decipolo sang Barangay Poblacion, Mabinay, Negros Oriental.
Ginpahanumdom naman ni Vinoya ang mga bag-o nagsulod nga mga soldado nga mangin matutom, dedikado, kag mangin tampad sa ila responsiblidad bilang katapo sang militar kag maghatag sang pinakamaayo kag dekalidad nga serbisyo para sa pumuluyo kag sa pungsod.
Nagasalig man si Vinoya nga ang nasambit nga mga bag-o sulod nga mga soldado ang makabulig sang dako sa kampanya sang gobyerno kontra sa lokal nga konflikto sa komunismo sa Central kag Western Visayas.
