Gin-igo sang mabaskog nga air strikes sang Israel ang Beirut kag malapit nga mga lugar sa Lebanon.
Natabo ang mga pag-atake pila ka oras matapos nga gindeklara ang ceasefire sa US-Israeli war batok sa Iran.
Suno kay Bombo International Jerlyn Lemera, International Correspondent sa Lebanon, naglab-ot na masobra 200 ka tawo ang napatay samtang 1,000 naman ka mga indibidwal ang pilason.
Dugang pa ni Lemera, nagtuga sang kakugmat kag kahadlok ang mga pag-atake sa mga residente, kag madamo ang nag-evacuate sa ila mga paluy-an padulong sa southern part sang Lebanon.
Pahayag pa niya, madamo man ang nadulaan sang trabaho kag nag-repatriate bangud man sa padayon nga pag-atake sa ila nga lugar.
Nagpasalamat man siya sa Philippine Embassy sa padayon nga pag-monitor sa ila kahimtangan kag sa paghatag sang suporta sa mga Pilipino sa Lebanon.
Nahibaluan nga lapaw na sa isa ka milyon ka tawo ang nagbiya sang ila puluy-an halin sang pagsugod sang inaway sa una nga bahin sang Marso.
Nagpanawagan man ang natungdan nga kuntani maaprubahan na ang ceasefire agud magbalik na ang kalinong kag katawhay sa ila nga lugar.
