ROXAS CITY – Nagdangat sa 257 tanan ka mga anay miyembro sang rebelde nga grupo ang nagsungka sa militar kag nagbalik sa sabak sang gobyerno sang nakaligad nga tuig 2019.
Ini ang ginpahayag sang tagpamaba sang 3rd Infantry Division-Philippine Army kag pinuno sang Division Public Affairs Office nga si Capt. Cenon Pancito III sang mainterview sang Bombo Radyo.
Suno sa opisyal ang nasambit nga mga anay rebelde ang gikan sa isla sang Panay kag Negros.
Suno diri nga magluwas pa ini sa linibo nga mga anay nagasuporta sa rebelde nga grupo.
Ginpahayag ni Pancito nga may mga anay rebelde nga nakaagom na sang bulig pinaagi sa Enhanced Comprehensive Local Integration Program (E-CLIP) sang gobyerno kag ang iban naman ang padayon nga gina-proseso.
Magluwas sa masangkad nga lihok sang militar, ginpahayag ni Pancito nga dako man ang nabulig sang Executive Order No. 70 nga nagapakita sang pagtingob sang lokal nga gobyerno kag iban pa nga ahensiya sang gobyerno sa pagbuligay agud masolbar ang problema sa insurhensiya sa pungsod.
