ROXAS CITY – Personal nga nagpadulong sa talatapan sang Bombo Radyo Roxas si Joe Marcelino, 26-anyos kag residente sang banwa sang Mambusao agud ireklamo ang live-in partner sini nga si Mardy Fragiao, 26-anyos kag residente naman sang banwa sang Dumalag bangud sa ginapahayag nga pagpangkastigo sa iya matapos ini nga madakpan nga may yara nga ka-chat nga iban nga lalaki.
Sa eksklusibo nga interview sang Bombo Radyo kay Marcelino, ginpahayag sini nga sa sulod sang 3 ka tuig kag 3 ka bulan nila nga pag-updanay ni Fragiao, maayo man ang ila pagsulundan, ginasuportaran kag ginahatag sini niya ang kinahanglanon sang iya nga live-in partner.
Suno kay Marcelino, lipod sa iya ihibalo nga sa pihak sang mga ginapanghimo kag pagtimakas sini sa obra agud mahatag ang kinahanglanon sang iya live-in partner, nahimo pa sya nga tuntunhon sini.
Sang Hulyo 1, ginpahayag nga naglisensya si Fragiao kay Marcelino agud kun tani nga magpauli sa ila balay agud magkuha sang requirements bangud maga-apply ini sang trabaho, apang bangud sa pagkabalaka nagtawag si Marcelino sa pamilya ni Fragiao agud tsekyaron kun naka-abot na ini sa ila.
Apang, ginkumpirmar sang iya pamilya nga wala sang laragway ni Fragiao nga nag-abot kag nagpakita sa ila puluy-an sa amu nga gab-i, rason agud didto na siya nagduda.
Bangud sini, nagsugod na siya suno diri nga magpangusisa kag diri niya nakumpirmar nga may yara ini sang iban nga lalaki nga ka-chat kag sa iya pagkompronta, diri nagluntad ang mainit nga komosyon sa tunga nila nga kun sa diin ginlampusan siya ni Fragiao sang matig-a nga bagay nga nagresulta sang pagpalanakit kag pilas sa magkatuhay nga parte sang lawas sini.
Kaangut sini, nakabaton man ini sang pagpamahog sa iya kabuhi rason nga ginpakamaayo na lamang niya nga magpa-blotter sa kapulisan.
Panawagan ni Marcelino sa anay live-in partner sini kag lalaki, nga kun mahimo atubangon ang reklamo nga ginpasaka batuk sa ila kag ginpanindugan sini nga indi siya mag-untat tubtob nga indi mapanabat si Fragiao kaupod ang bag-o sini nga lalaki.
