26 ka mga tawo, patay sa pagpangbomba sang Russia sa humanitarian aid center sa Ukraine

Indi magnubo sa 26 ka tawo ang napatay matapos ginbombahan sang pwersa sang Russia ang isa ka eskwelahan nga ginagamit bilang humanitarian aid center sa Zaporizhzhia region, Ukraine.
‎
‎Suno kay Ukrainian President Volodymyr Zelenskyy, naghimo sang duha ka separado nga pag-atake ang Russia, kon sa diin una sini nga ginpuntariya ang eskwelahan antes liwat nga ginbombahan ang building nga nagaserbe nga palasilungan sang mga residente.
‎
‎Lakip sa mga napatay amo ang duha ka rescue workers kag apat ka pulis nga nagresponder sa lugar, samtang lima naman ang pilason.
‎
‎Padayon ang search and rescue operations bangud may yara pa sang mga residente nga ginapatihan nga natabunan sang narumpag nga mga bahin sang building.