ROXAS CITY – Nagdangat na sa 26 katawo ang patay sa pagtay-og sang magnitude 7 nga linog sa Turkey kag Greece.
Suno kay Bombo International Correspondent Jealexiz Makenzy Corros nakabase sa Istanbul, Turkey kag tumandok sang Barangay Milibili, Roxas City nga nakabatyag man sila sang gamay nga pagtay-og kag pila ka mga napagkit nga mini tsunami sa Izmir City kun sa diin nagresulta naman sang pila ka mga pagbaha.
Ginpahayag sini nga naglab-ot naman sa 20 ka mga edipisyo ang narusdak matapos ang mabaskog nga linog kun sa diin nagresulta sang masobra 800 ka mga Turkish ang pilason.
Magluwas diri, may isa ka ospital naman ang nakapagkit sang pila ka mga kahalitan bangud sa pagtay-og kun sa diin pila ka mga pasyente ang temporaryo nga ginpaguwa sa nasambit nga pasilidad.
Temporaryo naman nga nadulaan sang suplay sang kuryente kag internet connection ang ila lugar.
Sa pihak sini, nagpasalamat naman si Corros nga wala sang Filipino ang nadalahig ukon napilasan bangud sa linog.
Samtang, nagapadayon naman ang search and rescue operation sa lugar kun sa diin pila ka mga indibidwal naman ang natiphagan sang mga edipisyo.
