ROXAS CITY – Nagparekord sa Roxas City Police Station ang isa ka 27-anyos nga ginang matapos nga ginaalegar nga gindakop sang mga pulis ang iya live-in partner sa ginkasa nga drug buybust operation sa Barangay Banica, Roxas City.
Suno kay Jessa Demacusa sang nasambit nga lugar nga samtang nagaluto ini sang ila nga panyapon ginsugo sini si Wilfredo Agudo nga magbakal sang ice apang nakibot na lamang ini sang ginsugiran nga nadakpan ang iya live in partner sa drug buybust operation.
Hugot ang panindugan sang nasambit nga tagreklamo nga wala nagagamit ukon nagaduso sang iligal nga droga ang iya live in partner.
Bangud diri, ginpakamaayo na lamang sang tagreklamo nga iparekord sa pulisya ang insidente.
Matandaan nga nadakpan si Agudo kaupod si Jomer Durana 33 anyos sa ginkasa nga drug buybust operation sa nasambit nga barangay.
Narekober naman sa posisyon kag kontrol sang duha ka mga suspetsado ang 6 ka mga plastic sachets nga ginapatihan shabu, isa ka unit sang cellphone kag P1000 nga marked money.
