ROXAS CITY – Positibo nga nagaduso sang illegal nga droga ang 28-anyos nga lalaki nga nakuhaan sang armas-luthang kag ginapatihan shabu matapos gin-implementaran sang search warrant sa Medalla Milagrosa Ville, Barangay Timpas, Panitan, Capiz.
Matandaan nga ginkilala ang nagkaladakpan nga sanday Francis Eugene Catalan residente sang nasambit nga lugar kag isa ka menor de edad nga residente sang Barangay Poblacion Ilaya sa amu man nga banwa.
Sa interview sang Bombo Radyo kay Maj. Pedro Goldino Diocson hepe sang Panitan Municipal Police Station, ginpahayag sini nga ginpadulungan nila ang balay ni Catalan agud kun tani istoryahon apang wala ini nakighinala sa ila rason nga ginpwersa nila nga buksan ang mayor nga pwertahan sang amu nga puluy-an agud magpatigayon sang search warrant.
Nakuha sa paghinakop sang suspek ang 4 tanan ka unit sang homemade cal. 38 revolver kag mga bala, 23 ka mga sachets sang ginapatihan shabu nga ginabulubanta may standard drug price nga masobra P137,000.
Suno kay Diocson, posible nga nahibaluan na sang iya pamilya ang iya malain nga buluhaton bangud ginapahayag nga sa balay mismo sang iya ginikanan nagakatabo ang pagbaligya sang illegal nga droga.
Mahibaluan 21 na ka barangay ang natigayon nga drug cleared sa banwa sang Panitan kag 8 pa ang nagapabilin nga indi kag padayon pa nga ginalimpyo sang mga otoridad.
Ang search warrant nga gin-isyu kag ginpirmahan ni Executive Judge, Esperanza Isabel E Poco-Deslate sang Regional Trial Court, 6th Judicial Region, Branch 19, Roxas City, kag napetsahan Hulyo 11, 2023.
Sa karon, natalana nga pasakaan sang patung-patong nga kaso ang mga nasambit nga nagkaladakpan.
