ROXAS CITY – Ginkompirmar sang isa ka 28 anyos nga lalaki nga residente sang Barangay Poblacion Tabuc, Panay, Capiz nga nakabakal sa iya sang motorsiklo ang 19 anyos nga soltero nga gin-preso matapos nakuhaan sang na-motornap nga motorsiklo nga ginaalegar nakuha pinaagi sa pagpakig-barter sa social media.
Suno kay Rolly Besana, mangin siya ang nakibot sang nabatian sa balita nga ginpreso si Justine Brillo matapos nakuhaan sang Rusi 150 nga una nga na-motornap.
Ginpahayag ni Besana nga sadtong Hunyo 13, ginbakal ni Brillo sa balor nga P9, 000 ang iya nga Rusi 125 kun sa diin nagkit-anay sila sa siyudad sang Roxas.
Matapos mabakal ni Brillo ang Rusi 125, diri kag ginapahayag nga nagpakig-barter ini sa isa ka persona sa social media sa Rusi 150 sa Barangay Dayao.
Una na nga ginpahayag ni Brillo nga tuman ang kakibot sini sang ginpadulongan sang mga kapulisan sa ila nga panimalay kag ginabawi ang motorsiklo nga ginapahayag nga kinawatan.
Sandig sa panayasayon ni Brillo, nagpost ini sa social media nga nagapangita sang motorsiklo nga mahimo butangan sang sidecar.
Gindugang pa ni Brillo, nga nagkasugot sila sang nasambit nga suspetsado nga magbayluhanay na lamang sang ila mga motorsiklo.
Apang ginkadismaya sini sang nahibaluan nga kinawatan ang nabaton sini nga motorsiklo gikan sa barter.
Gintuyo pa ni Brillo nga magpadala sang mensahe sa Facebook apang ginblock ini sang nasambit nga suspetsado.
