ROXAS CITY – Nagparekord sa Roxas City Police Station ang isa ka 28 anyos nga lalaki matapos ginaalegar ginsumbag sang isa ka lalaki sa Roxas Avenue, Roxas City.
Ang nagparekord amo si Rafael Gervasio, residente sang Barangay San Jose, sining siyudad.
Sandig sa reklamo ni Gervasio, gikan siya sa Arnaldo Blvd., sining siyudad kag padulong kuntani ini sa Rizal Street sakay sa iya motorsiklo sang ginaalegar gintambangan sang salakyan ni Jose Fuentes, 59 anyos sang Barangay Cagay, sining siyudad.
Suno diri nga ginbusinahan pa sini ang salakyan ni Fuentes apang wala ini nakabati rason nga siya ang nagpanaog sa iya motorsiklo kag ginkompronta si Fuentes.
Apang suno diri sang iya ginpakita ang iya ID kay Fuentes, ginkumos ini ni Fuentes kag nagsulod sa iya salakyan kag naglakat.
Ginsunod ini ni Gervasio kag pag-abot sa Roxas Avenue, ginaalegar nga nagpanaog sa iya salakyan si Fuentes.
Diri kag nagbaisay sang duha tubtob sa ginaalegar ginsumbag ni Fuentes si Gervasio.
Apang sandig naman sa ginpabalhag man nga reklamo ni Fuentes, ginsakuan siya ni Gervasio bangud ginhulat sini nga mag-signal sang ‘GO’ ang traffic lights.
Suno kay Fuentes nga ginsinggitan siya ni Gervasio apang wala niya ini ginsapak kag sang nag-signal na sang ‘GO’ ang traffic lights, naglakat na ini sakay sa iya salakyan.
Apang sang iya natalupangdan nga ginasundan siya ni Gervasio, diri kag ginkompronta niya ini apang wala suno diri sang kamatuoran nga iya ini nga ginsumbag bangud sa pagkamatuod suno sa iya, ginakuha ni Gervasio ang iya kamot kag ginahangkat nga siya ang sumbagon.
