28 anyos nga lalaki pilason matapos maaksidente sa ginamaneho nga motorsiklo sa Cuartero

ROXAS CITY – Pilason ang 28 anyos nga lalaki matapos maaksidente sa ginamaneho sini nga motorsiklo sa Barangay Poblacion Takas, Cuartero, Capiz.

Ginkilala ang biktima nga si Ivan Saldevia, residente sang Barangay Taslan, banwa sang Dumarao.

Base sa impormasyon nga nakuha sang Bombo Radyo, igadul-ong kuntani ni Saldevia ang iya backrider apang sang may nagtabok nga ido sa karsada, nadulaan ini sang kontrol sa manubela sang motorsiklo.

Natumba ang motorsiklo kag tumampilak sa karsada ang biktima rason nga nakaangkon ini sang bali sa nawala nga tiil.

Gilayon nga gindala sa ospital ang biktima agud madapatan sang nagakaigo nga pagbulong.

Maswerte naman nga wala napilasan ang iya nga backrider.