ROXAS CITY – Padayon nga ginabulong sa ospital ang isa ka lalaki matapos nga nagbungguanay ang duha ka motorsiklo sa Barangay Tanque, Roxas City.
Ginkilala ang biktima kay Edison Cosca, 28-anyos sang Barangay Dinginan sining siyudad.
Base sa inisyal nga imbestigasyon sang Roxas City PNP nga samtang ginasubay sang biktima ang dalanon sang aksidente na lamang ini nabungguan sang isa ka motorsiklo nga ginamaneho naman ni Christina Rose Agusan 20-anyos sang Barangay Dinginan sining siyudad kag ginaalegar nga yara sa idalom sang impluwensya sang makahulubog nga ilimnon.
Bangud diri, nag-angkon sang pilas sa lawas ang biktima nga madasig naman nga gindapatan sang nagakaigo nga pagbulong sang nagresponde nga Roxas City Emergency Response Team (RCERT) kag gindala sa ospital para sa nagakaigo nga pagbulong.
