ROXAS CITY – Pilas sa tiyan ang naangkon sang isa ka 28-anyos nga persona matapos nga ginaalegar ginbuno sa Barangay Mongpong, Roxas City.
Ginkilala ang biktima nga si Darwin Bacillo sang nasambit nga lugar.
Base sa inisyal nga imbestigasyon sang Roxas City Police Station nga nag-angkon sang pagbaisay ang biktima kag suspek nga si Ramund Alaro 27-anyos sang amo nga lugar.
Bangud diri, hinali na lamang nga gintapungol sang biktima ang suspek rason nga naggabot ini sang kutsilyo kag ginbuno si Bacillo.
Nag-angkon naman sang pilas sa tiyan ang biktima nga gilayon gindala sa ospital agud dapatan sang nagakaigo nga pagbulong.
Gilayon man nga naaresto sang mga kapulisan ang suspek nga si Alaro kag nakahunong na karon sa karsel sang Roxas City Police Station.
Sa exclusive interview sang Bombo Radyo, ginpahayag ni Alaro nga nagapungko lamang siya kag gingubat sang biktima kag gintapungol.
Panindugan sini nga nagbalos lamang siya ilabi pa nga may tatlo pa ka mga kaupdanan ang biktima nga nagkastigo sa iya.
Gindugang pa sini nga ginsumbag man siya sadto sang biktima.
Ginkompirmar naman ni Punong Barangay Ricky Donato nga may rekord sa ila barangay ang suspek.
Suno diri nga masami ini nga ginareklamo sang iya mga kasilingan ilabi pa kun mahubog bangud nagatuga ini sang kinagamo.
