ROXAS CITY – Ginakabig nga asymptomatic ukon wala nakitaan sang anuman nga sintomas ang 28 anyos nga babaye nga taga-banwa sang Pilar nga Returning Overseas Filipino (ROF) kag kalakip sa 10 ka mga panibag-o nga nagpositibo sa coronavirus disease (COVID-19) sa probinsiya sang Capiz.
Ini ang ginkompirmar ni Pilar Municipal Administrator John Heredia sang mainterview sang Bombo Radyo.
Suno kay Heredia nga ang nasambit nga pasyente ang isa ka seafarer nga gikan sa United Kingdom.
Suno sa opisyal, una nga nag-negatibo sa real-time polymerase chain reaction (RT-PCR) test ang nasambit nga pasyente sa Metro Manila rason nga nakapauli ini sa probinsiya.
Samtang nagapadayon ang 14-day quarantine sang nasambit nga persona sa quarantine facility sang banwa, liwat ini nga ginkuhaan sang swab specimen agud ipaidalom sa swab test.
Ginkompirmar man ni Heredia nga natapos na sang amo nga persona ang iya quarantine period apang naatrasar ang pagguwa sang resulta sang iya nga swab test.
Sa pihak sang ginahingyo sang nasambit nga pasyente nga magpauli na sa iya pamilya, nangin matigdas ang panindugan sang lokal nga gobyerno sang banwa nga ipabilin ini sa quarantine facility tubtob sa magguwa ang resulta sang iya nga swab test.
Bangud diri suno kay Heredia, wala sila nabudlayan sa contact tracing bangud yara lamang nagtenir sa ila quarantine facility ang amo nga persona.
Sa karon, yara na sa Roxas Memorial Provincial Hospital ang nasambit nga pasyente para sa iya nga hospital quarantine tubtob sa ini ang maka-rekober sa nasambit nga balatian.
