ROXAS CITY – May kabug-usan nga 28 tanan ka mga firetruck ang bug-os nga probinsya sang Capiz sa diin 27 diri ang serviceable kag 1 ang nagapabilin nga under-repair nga iya sang banwa sang Sapian.
Sa interview sang Bombo Radyo kay Supt. Jenny Mae Masip Provincial Fire Marshal – BFP Capiz, ginsiling sini nga indi malikawan nga magabatyag ang mga firetruck bangud sa katigulangon kag kadugayon sini.
Mahibaluan nga sadtong 1970, tubtob 2000 pa ang iban sa mga firetruck rason nga may mga tion nga nagakawasak ang mga gamit kag nagakinahanglan na nga islan.
Suno kay Masip, may yara na sang mga bag-o nga mga pala-abuton nga firetruck apang wala pa sang petsa kun san-o ini igahatag kag kun sa diin nga mga banwa.
Panugyan sini sa mga fire station nga sa tion may yara sang mga firetruck nga unserviceable sa ila hanay gilayon ini nga ipahibalo sa provincial office ukon regional office, subong man sa mga kaiping nga fire station agud sila makaresponde pananglitan nga may magluntad nga sunog sa ila lugar.
Ginpahayag man sini nga limitado lamang ang budyet nga nagikan sa gobyerno nasyunal rason nga nagapalapit ang mga ini sa tagsa ka mga Local Governmenr Unit (LGU) agud makapangayo sang suporta nga mapakay-o gilayon ang mga nawasak nga firetruck.
Dugang pa ni Masip nga ginapasanyog sang Bureau of Fire Protection ang programa nga Oplan Ligtas na Pamayanan (OLP) kalakip na diri ang paghanas sa mga Committee Fire Auxiliary Group (CFAG) kun anu ang himuon pananglitan nga may sunog, mga first aid, paano maggamit sang mga fire extinguisher.
Ang CFAG, ang una nga magaresponde sa tion nga may yara sang sunog sa ila barangay.
Ang nasambit nga programa, nasuguran na sa bug-os nga rehiyon 6 sadtong una nga quarter subong nga tuig.
