Pilas sa abaga ang naangkon sang 29-anyos nga lalaki matapos ginapahayag nga ginlabo samtang nagalakat-lakat sa ugsaran sang ila puluy-an sa Sitio Tinggas Brgy. Balucuan Dao Capiz.
Ginkilala ang biktima kay alyas “Sammy”, samtang ang ginatudlo naman nga suspek ang ginkilala kay alyas “John”, 38-anyos kag lunsay mga residente sang nasambit nga lugar.
Sa inisyal nga impormasyon nga nakuha sang Bombo Radyo nagikan sa Dao MPS, ginapahayag nga sang takna alas 3:15 sang kaaganhon sa mismo nga adlaw sang paskwa, samtang nagalakat-lakat ang biktima sa guha sang ila puluy-an, hinali nalang ini nga ginlabo sang suspek sa likod nga posyon sang tuo sini nga abaga gamit ang isa ka hinganiban.
Gilayon naman ini nga ginrespondehan sang Dao Emergency Response Unit kag gindala sa Dao District Hospital para sa nagakaigo nga pagbulong.
Samtang ang suspek naman ang madasig nga nakapalagyo sa lugar matapos nakumiter ang insidente.
Sa karon, padayon pa nga gina-imbestigaran sang Dao PNP angut sa natabo nga insidente kag nagpatigayon naman ang mga ini sang hot pursuit operation agud madakpan ang amo nga suspetsado.
