2nd batch sang ayuda nagikan sa City Government igapanagtag subong sa mga residente sang Barangay Libas sining siyudad

ROXAS CITY – Aminado si Punong Barangay Richard Arrojado nga may pila ka mga residente ang wala nahatagan ukon nakabaton sang ayuda gikan sa City Government sa Barangay Libas, Roxas City.

Sa interview sang Bombo Radyo kay Arrojado nga nagalab-ot sa 2,149 ang iya mga households sa nasambit nga barangay.

Ginpahayag sini nga posible wala nalakip ang iban bangud kulang pa ang ayuda nga una na ginpadala sa ila barangay para kuntani sa ila mga residente.

Nagpasalig naman si Arrojado nga makabaton sang ayuda ang tanan nga mga residente sini sa amo nga barangay.

Kalakip sa mga ayuda nga ginapanghatag sa mga residente amo ang bugas, de lata kag mga kape.

Samtang, ginpahayag naman sang amo nga opisyal nga makabaton na sang ayuda ang mga residente nga nalakip sa listahan sang 2^nd batch.

Matandaan sang damlag lang nagpatigayon rally ang mga residente sang amo nga barangay sa talatapan mismo sang City Social Welfare and Development Office ukon CSWDO.