Nagpakigbahin sang ila mga preparasyon kag advocacy ang Second batch sang Lin-ay kag Hangaway sang Capiz 2026.
Ini ang nasambit nga kompetisyon ang kabahin sang selebrasyon sang Capiztahan 2026 sa Probinsya sang Capiz.
Sa interview sang Bombo Radyo kay Hannah Faith Alimen Delos Santos, Lin-ay sang Ivisan Capiz, iya ginpahayag nga isa ka daku nga kadungganan nga makajoin siya sa nasambit nga kompetisyon bangud magamit niya ini nga isa ka platform para sa mga kabataan nga indi kabalo magbasa kag mapangitaan sang paagi nga matudluan sila indi lang sa eskwelahan.
Suno kay Faith, isa sa mga gina-practice nila kon paano gina-enhance ang ila nga personality, labi na sa pag-handle sang time agud nga malab-ot nila ang ila nga goal.
Pahayag pa sini nga ang pageant indi lang panami-nami sang paglakat kondi isa ini ka dako nga responsibilidad nga ginadala ukon ginrepresentar ang imo nga kaugalingon kag banwa labi na sa pag-impower sa mga kababainhan.
Samtang, suno naman kay Ma. Pean Aman Arciga, lin-ay sang Sigma, Capiz, iya ginpahayag nga isa ka daku nga mangin kabahin sang Lin-ay kag Hangaway sang Capiz 2026 bangud indi lang ini sang ginatawag nga pagwapa kundi isa ini ka dalan agud mapakita ang imo nga maayo nga pinamatasan kag mapabugal ang iya nga banwa nga ginapresentar.
Dugang pa sini, nga isa sa mga inspiration niya amo ang iya nga Pamilya labi na ang iya nga tiya nga nagtaliwan na bangud isa ini sa nagtulod kag nagpursigi nga mag-join siya sa nagkalain-lain nga pageant.
Pahayag pa niya nga ang purpose sang lin-ay kag hangaway 2026 indi lang basta sa ginarepresent kon ano kanami ang imo nga bayo, kon ano ka kagwapa, kag kon ano kabaskog ang imo nga ginadala nga banwa kondi isa ini ka pamaagi nga ma promote ang Kultura kag Tradisyon sang Probinsya sang Capiz.
Samtang suno naman kay Jed Michael M. Dailig, Hangaway sang Banwa sang Sigma, iya ginpahayag nga importante gid ang focus sa competition lakip na ang paghanda sang kaugalingon mentally, physically, emotionally and spiritually.
Suno sa iya indi lang ini sang ginatawag nga pagwapo kundi isa ini ka dako nga responsibilidad agud mapakita ang imo ikasarang sa sini nga kompetisyon.
Pahayag pa niya nga isa kado nga biggest challenge sa iya amo ang saot apang gina-practice niya gid ini agud mapakita ang iya ikasarang kag magdaog sa sini nga Kompetisyon.
