ROXAS CITY -Emosyonal nga nagpangayo sang pasaylo kag ikaduha nga tsansa si Michael Christian Singh, 27 anyos sa misis sini sang personal nga nag-atubangay sa Bombo Radyo.
Ginpahayag ni Michael nga aminado ini nga may yara man siya sang kakulangan sa natabo nga indi nila pag-intindihanay sang misis nga si Mary Angel Singh nga naglab-ot sa punto nga ginsakit siya sini.
Suno sa mister nga kun nagpangayo lamang sang pasaylo ang iya misis sang ginlampusan siya sini sang tasa sa ulo, indi na mag-abot pa sa punto nga magareklamo siya sa pulisya kag sa Bombo Radyo.
Ginpasalig man sini nga tinguhaan niya nga matuman ang mga ginpasalig sini sa misis nga magapangita sang trabaho kag dulaon ang mga bisyo nga masami nila ginaawayan.
Luyag sa karon ni Singh nga mag-ayuhay sila sang misis bangud indi sini luyag nga mabun-ag ang anak nga ginadala sang iya misis nga wala sang amay.
‘SPACE’, GINAHINYO SANG MISIS KAY MISTER
Luyag naman ni Mary Angel Singh nga temporyayo sila nga magbulagay sang iya bana nga nagreklamo sa pulisya kag sa Bombo Radyo matapos bangud sa iya nga pagpangsakit.
Aminado si Mary Angel nga palangga pa sini ang bana nga si Christian Michael Singh apang luyag niya nga temporaryo anay sila nga magbulagay para makatutok sa iya trabaho.
Gindugang pa sini nga nahuya siya sa mga ila mga kaingud-balay bangud sa ila away sang iya nga bana.
Nahuya naman ini sa iya mga ginikanan bangud sa ila paglumon sa isa ka balay.
Aminado man ang misis nga nakapoy na siya sa mga pasalig sang mister nga magapangita sang trabaho apang wala sa gihapon nagatupa.
Sa pihak sang emosyunal nga pagpangayo sang pasaylo sang bana, nagpanindugan ang misis sa desisyon nga temporaryo anay sila nga magbulagay.
Ginpakamaayo naman sang pamunuan sang Bombo Radyo nga itugyan sa talatapan sang Women and Children Protection (WCPD) sang Roxas City Police Station ang mag-asawa para sila ang mahusay.
