ROXAS CITY – Padayon sa karon nga nagapaidalom sa hospital quarantine ang 25 anyos nga lalaki nga ika-duha nga kaso sang coronavirus disease (COVID-19) sa siyudad sang Roxas.
Ini ang ginpahayag mismo ni Roxas City Mayor Ronnie Dadivas sa iya ginpatawag nga press-conference kasunod sang iya kompirmasyon sandig sa ginpaguwa nga datos sang Capiz Provincial Health Office kag Department of Health.
Suno kay Dadivas nga ang nasambit nga lalaki ang residente sang Barangay Dayao, Roxas City.
Nahibaluan nga ang nasambit nga pasyente ang may yara sang travel history sa Metro Manila kag nag-abot sa Roxas City sadtong Marso 14, 2020.
May yara ini sang exposure sa isa sa mga COVID-19 positive patients sa probinsiya sang Capiz.
Ginpahayag sang alkalde nga yara sa karon sa estable nga kondisyon ang nasambit nga lalaki bangud makabig ini nga asymptomatic ukon wala nakitaan sang anuman nga sintomas sang nasambit nga balatian.
Ginpahayag naman ni City Health Office Dr. Lory Cahilog nga apisar ‘asymptomatic’ ang nasambit nga persona, ginpakamaayo nga ipaidalom ini sa hospital quarantine agud masiguro ang iya kaluwasan kag indi maapektuhan ang iban nga pumuluyo.
Suno diri nga yara wala na gin-refer sa Western Visayas Medical Center ang nasambit nga pasyente kag nagapabilin ini karon sa Roxas Memorial Provincial Hospital.
Nagapadayon naman ang contact-tracing sa tanan nga nakahalubilo sang nasambit nga pasyente kag sila ang ginapanugyanan nga magpaidalom sa strict home quarantine.
